Rangoon

بالی وڈفلم ’’رنگون ‘‘ کے رنگ میں‌بھنگ پڑ گئی

ممبئی(مانیٹرنگ ڈیسک) ممبئی کی ہائی کورٹ عدالت نے اداکارہ کنگنا رناوت کی فلم’’ رنگون‘‘ کو 2 کروڑ روپے کی ضمانت کے عوض پر نمائش کی اجازت دے دی۔بالی ووڈ اداکارہ کنگنا رناوت کی فلم رنگون نمائش سے قبل ہی تنازعات کا شکار ہوگئی ہے اور فلم 82 سال پرانے کردار کو کاپی کرنے کے مقدمے میں پھنس چکی ہے تاہم عدالت نے فلم کو مشروط طور پر نمائش کی اجازت دے دی ہے اور اس طرح فلم کو نمائش سے قبل ہی کروڑوں کا جھٹکا لگ چکا ہے۔بھارتی میڈیا رپورٹس کے مطابق واڈیا مووی ٹون پروڈکشن کمپنی نے ہدایتکار وشال بھردواج کی فلم رنگو ن میں اداکارہ کنگنا رناوت کے کردار مس جولیا پر الزام عائد کیا تھا کہ یہ کردار 1935 کی فلم ہنٹر والی کی اداکارہ فیئرلیس نادیہ کا چربہ ہے جب کہ کمپنی نے اس کے خلاف بمبئے ہائیکورٹ سے رجوع کیا تھا جس کے بعد ہائی کورٹ کے 2 رکنی بینچ نے فلم رنگون کو سماعت مکمل ہونے تک 2 کروڑ روپے کی مشروط ضمانت کے ساتھ نمائش کی اجازت دے دی ہے۔دوسری جانب عدالتی فیصلے کے بعد فلم کے پروڈیوسرز نے 2 کروڑ کی ضمانت جمع کرادی ہے جس کے بعد فلم آج نمائش کے لیے پیش کردی گئی ہے۔واضح رہے کہ فلمرنگون میں سیف علی خان، شاہد کپور اورکنگنا رناوت نے مرکزی کردار کیا ہے۔