دنیا بھر میں مو جو د مداحوں کا انتظارختم ، سلمان خان نے اپنی شادی کی تاریخ کا اعلان کردیا

اسلام آباد (مانیٹرنگ ڈیسک) بالی وڈ کے دبنگ خان سلمان خان کروڑوں مداحوں کے دلوں پر راج کرتے ہیں۔ کئی عوامی مقامات اور تقریبات میں سلمان خان سے ان کی شادی سے متعلق سوالات کئے جاتے ہیں لیکن وہ بخوبی گھُما پھرا کر ان کا جواب دیتے ہیں اور اپنی جان چھُڑا لیتے ہیں۔ حال ہی میں معروف بھارتی کامیڈین کپل شرما کے شو میں بھی بالی وڈ کے دبنگ خان سلمان خان نے شرکت کی جہاں ان سے یہی سوال پوچھا گیا۔ سلمان خان سے پوچھا گیا کہ آخر وہ کب شادی کریں گے ، جس پر انہوں نے کوئی واضح جواب تو نہیں دیا ، البتہ سلمان خان نے شادی سے متعلق اشارہ ضرور دے دیا۔

سلمان خان نے شادی سے متعلق پوچھے گئے سوال پر جواب دیتے ہوئے کہا کہ میری فلم بھارت میں بھی میری شادی نہیں ہوئی، فلم میں میری شادی 72 سال کی عمر میں ہوئی لہٰذا میں فلم کے نظریے کی ہی پیروی کر رہا ہوں۔ سلمان خان نے مُسکراتے ہوئے کہا کہ میں نجی زندگی میں بھی اپنی فلم والی زندگی کو ہی فالو کر رہا ہوں۔ بالی وڈ میں حال ہی میں کئی شادیاں دیکھنے میں آئیں لیکن بالی وڈ اور دبنگ خان سلمان خان کے مداح اپنے پسندیدہ فلمسٹار کو شادی کے بندھن میں بندھتے دیکھنے کے لیے سخت بے چین ہیں۔ سلمان خان کی فلم بھارت رواں سال ریلیز ہو گی جس میں سلمان خان کے ہمراہ کترینہ کیف اداکاری کے جوہر دکھائیں گی۔ سلمان خان اور کترینہ کیف کی جوڑی بالی وڈ کی مشہور اور پسندیدہ ترین جوڑیوں میں سے ایک ہے ، یہی وجہ ہے کہ اس جوڑی کے پردے پر آنے سے فلم کی کمائی میں کئی گُنا اضافہ ہو جاتا ہے۔ گذشتہ برس اگست میں جب اس فلم کی پہلی جھلک جاری کی گئی تو محض ایک گھنٹہ کے اندر سلمان خان اور ان کی ہیروئن کترینہ کیف کی تصویر کو 6 لاکھ سے زیادہ لوگوں نے لائیک کیا تھا۔