ایف اے ٹی ایف نےپاکستان کے سامنے نئے مطالبات رکھ دیئے

اسلام آباد(سٹیٹ ویوز) فنانشل ایکشن ٹاسک فورس نے ملک بھر کے صرافہ بازاروں کو دستاویزی بنانے، سونے کی خرید و فروخت کو ریگولرائز بنانے اور ضلعی سطع پر رجسٹرڈ ویلفیئر ٹرسٹ کا ڈیٹا اکٹھا کرنے سمیت دیگر مطالبات کی فہرست پاکستانی وزارت خزانہ کو دیدی ہے۔

ایف اے ٹی ایف کے ساتھ ایکشن پلان پر عملدرآمد کے بارے میں اگلے 3 دور ہونے ہیں۔ اس کے بعد جون اور جولائی میں ایکشن پلان پر عملدرآمد کا جائزہ لیا جائے گا۔

ذرائع کا کہنا ہے کہ ایف اے ٹی ایف کی جانب سے دی جانے والی تجاویز میں کہا گیا ہے کہ سونے کے لین دین کے لیے بینک کارڈز یا دیگر رجسٹرڈ آلات استعمال کئے جائیں اور ملک میں زیورات خریدنے والوں کا ڈیٹا اکٹھا کیا جائے تاکہ سونے اور زیورات دہشت گرد تنظمیوں تک نہ پہنچ پائیں۔

علاوہ ازیں ضلعی سطح پر ٹرسٹ کے اکاؤنٹس کی تفصیلات اکٹھی کی جائیں اور ان تفصیلات پر مبنی الیکٹرانک ڈیٹا بینک قائم کیا جائے جس کی تسلسل کے ساتھ مانیٹرنگ کی جائے گی تاکہ اس کا غلط استعمال نہ ہو سکے۔

پاکستان آج فنانشل ایکشن ٹاسک فورس کو ایکشن پلان پر عملدرآمدی رپورٹ پیش کرے گا۔ذرائع کے مطابق یہ پاکستان کی طرف سے ایف اے ٹی ایف کو جمع کروائی گئی تیسری عملدرآمدی رپورٹ ہو گی۔

اپنا تبصرہ بھیجیں