یہودی آبادکاروں کا مسجد اقصیٰ پر دھاوا، مفتی اعظم مصر کی شدید مذمت

قاہرہ(مانیٹرنگ ڈیسک) مفتی اعظم مصر علامہ شوقی علام نے مسجد اقصیٰ پر یہودی آبادکاروں کے دھاوؤں کی شدید الفاظ میں مذمت کی ہے۔تفصیلات کے مطابق جمہوریہ مصر مفتی اعظم علامہ شوقی علام نے ایک بیان میں مسجد اقصیٰ پریہودی آبادکاروں کے دھاوؤں کی شدید الفاظ میں مذمت کرتے ہوئے کہا ہے کہ قبلہ اول پردھاوے اور القدس کو یہودیانے کی سازشوں کے خطرناک نتائج سامنے آئیں گے۔

غیر ملکی خبر رساں ادارے کے مطابق مصری دارالافتاء کی طرف سے جاری ایک بیان میں کہا گیا ہے کہ مفتی اعظم مصر نے قبلہ اول پر یہودی آباد کاروں کے دھاوؤں کی شدید الفاظ میں مذمت کی ہے اور کہا ہے کہ اسرائیلی پولیس کی فول پروف سیکیورٹی میں یہودی آباد کاروں کے قبلہ اول پر اشتعال انگیز دھاوے انتہائی تشویش کا باعث ہیں۔مصر کے مفتی اعظم نے خبردار کیا کہ القدس کو یہودیانے اور قبلہ اول پر صہیونی یلغار کے خطرناک نتائج سامنے آئیں گے۔

علامہ شوقی علام نے کہا کہ القدس کے مقدس مقامات کو یہودیانا شہر کے حقیقی تشخص کو پامال کرنے کی مجرمانہ کوشش ہے جس کی جتنی مذمت کی جائے کم ہے۔انہوں نے عالمی برادری پر زور دیا کہ وہ القدس اور قبلہ اول کے تحفظ کو نقصان پہنچانے کی صہیونی ریشہ دوانیوں کا سختی سے نوٹس لیں۔خیال رہے کہ گذشتہ دنوں سینکڑوں یہودی آباد کاروں نے مسجد اقصیٰ پر دھڑلے سے گھس آئے تھے، جبکہ مسلمانوں نے مزاحمت کرتے ہوئے تکبیر کے نعرے بلند کیے تھے۔

اپنا تبصرہ بھیجیں