چلاس،جیپ دریا میں گر گئی،7افراد جاں بحق

چلاس(سٹیٹ ویوز)گلگت بلتستان کے علاقے چلاس میں شکدآباد کے قریب مسافر جیپ کھائی میں گرنے سے 7 افراد جاں بحق ہو گئے۔تفصیلات کے مطابق چلاس میں شکدآباد کے قریب گاڑی کھائی میں گر گئی، جس کے نتیجے میں سات افراد جاں بحق ہو گئے.

مرنے والوں کی لاشیں دریا سے نکال لی گئیں۔جیپ میں 21 افراد سوار تھے، حادثے میں ریسکیو کیے گئے افراد کی تعداد 14 ہو گئی ہے، تاہم 2 افراد تا حال لاپتا ہیں.

ڈی پی او چلاس کا کہنا ہے کہ بچائے گئے افراد میں سے 3 زخمی ہیں۔چلاس پولیس کا کہنا ہے کہ دریا میں ڈوبنے والے 2 افراد کی تلاش جاری ہے۔بتایا گیا ہے کہ حادثہ اس وقت پیش آیا جب ڈرائیور گاڑی پر قابو کھو بیٹھا تھا.

حادثے کے بعد ریسکیو 1122 اور مقامی لوگوں نے جائے وقوع پہنچ کر ڈوبے ہوئے لوگوں کو نکالنے کے لیے ریسکیو آپریشن شروع کیا۔حادثے میں زخمی ہونے والے افراد کو چلاس کے ضلعی اسپتال میں طبی امداد کے لیے منتقل کر دیا گیا ہے۔

خیال رہے کہ چلاس میں دیامر کے پہاڑی علاقوں میں دس دن قبل موسلا دھار بارشوں کا سلسلہ شروع ہوا ہے، جب کہ ہلکی ہلکی برف باری بھی ہو رہی ہے، دیامر میں بارشوں کے باعث طغیانی کا خدشہ در پیش ہے۔

اپنا تبصرہ بھیجیں