قارئین، ہندوستان ہندوتوا کے نظریے پر سختی سے عمل پیرا ہے۔ ہندوتوا ہندوستان میں ہندو قوم پرستی کی ایک غالب شکل ہے۔ اس اصطلاح کو سیاسی نظریہ کے طور پر ونائک دامودر ساورکر نے 1923 میں وضع کیا تھا۔ اسے راشٹریہ سویم سیوک سنگھ (آر ایس ایس)، وشو ہندو پریشد (وی ایچ پی)، بھارتیہ جنتا پارٹی (بی جے پی) اور دیگر تنظیمیں، جن کو اجتماعی طور پرسانگھ پریوار کہا جاتا ہے استعمال کرتی ہیں. ہندوتوا تحریک کو دائیں بازو کی انتہا پسندی کی ایک قسم کے طور پر بیان کیا گیا ہے، اور “کلاسیکی معنوں میں یہ تقریباً فاشسٹ” کے طور پر یکساں اکثریت اور ثقافتی بالادستی کے تصور پر قائم ہے۔ مودی اسی ہندوتوا کے نظریے کے پیروکار ہیں جو ہندوستان اور ہندوؤں کی بالادستی پر یقین رکھتی ہے۔ وہ اقلیتوں سے متعلق انسانی حقوق کے مسائل کو نظرانداز کرنے کی اسی ذہنیت کے ساتھ آگے بڑھ رہے ہیں۔ وہ ہندوتوا کی آئیڈیالوجی کے تحت ہندوستان کی اقلیتوں اور پڑوسی ممالک پر اپنی گرفت قائم رکھنا چاہتے ہیں۔
ونائک دامودر ساورکر، جو بی جے پی کی ایک اہم شخصیت ہیں، وہ ہندوستانی سیاست اور سماج پر نمایاں ثر و رسوخ رکھتے ہیں. انہوں نےاپنے پمفلٹ “ہندوتوا: ہندو کون ہے؟”جو 1923 میں شائع ہوا، میں ہندوتوا کے اپنے وژن کو ایک سیاسی اور ثقافتی خیال کے طور پر بیان کیا جو ہندو راشٹر (قوم) کی تشکیل کرتا ہے۔ ساورکر کی ہندومت کی تشریح نے یورپ میں فاشزم اور نازی ازم جیسی دائیں بازو کے سیاسی گروہوں سے تحریک حاصل کی۔ 1923 میں ساورکر نے ایسے بیانات دیئے جو مسلمانوں کے درمیان متنازعہ رہے ہیں۔ ان بیانات کا جب مسلم پوائنٹ آف ویو سے جائزہ لیا جائے تو مذہبی تکثیریت اور اقلیتی برادریوں کے حقوق کے بارے میں ان کے موقف پر سوالات اٹھتے ہیں۔ مزید برآں، مساجد کے بارے میں ساورکر کے خیالات نے بھی انکی طرف توجہ مبذول کی ہے۔ مساجد کے انہدام اور تعمیر نو کے بارے میں ان کا موقف خاص طور پر مسلم کمیونٹی کے لیے بحث اور تشویش کا موضوع رہا ہے۔ “مسلمان یا تو ہندو ثقافت اور زبان کو اپنا سکتے ہیں، یا وہ اس ملک میں مکمل طور پر ہندو قوم کے ماتحت رہ سکتے ہیں، جس کا دعویٰ کچھ بھی نہیں، کسی مراعات کے مستحق نہیں، اس سے بھی کم ترجیحی سلوک، حتیٰ کہ شہریوں کے حقوق بھی نہیں۔” – یہ بیان ساورکر کے اس نظریے کی عکاسی کرتا ہے کہ ہندوستان میں مسلمانوں کو ہندو ثقافت میں ضم ہو جانا چاہیے یا ہندو قوم کے اندر ماتحت مقام کو قبول کرنا چاہیے۔
بھارت اپنے ہندوتوا نقطہ نظر کے تحت بھارت میں مختلف اقلیتوں کی شناخت کے خلاف قانون سازی کرنے کی منصوبہ بندی کر رہا ہے۔ HNLU کے اشوک سمل نے اپنے مضمون میں اقلیتوں کے خلاف ایک نئی مجوزہ اور متنازعہ قانون سازی کے بارے میں جامع تفصیلات دی ہیں۔ حالیہ دہائیوں کے دوران، یکساں سول کوڈ (یو سی سی) کا مسئلہ وقتاً فوقتاً سنگھ پریوار، بائیں بازو کی جماعتوں اور حقوق نسواں کی طرف سے اٹھایا جاتا رہا ہے۔ اس کا ایجنڈا بی جے پی نے اٹھایا ہے۔ خاص طور پر 1985 میں شاہ بانو تنازعہ کے بعد سے (شاہ بانو نے شوہر سے طلاق کے بعد خرچ کا مطالبہ کیا کیونکہ وہ اخراجات پورا نہیں کر پا رہی تھیں؛ عدالت نے آرٹیکل 44 کے تحت یو سی سی کی ضرورت کا حوالہ دیتے ہوئے اس کے حق میں فیصلہ دیا)۔ یہ کیس اہم تھا کیونکہ، بھارتی سپریم کورٹ کے فیصلے نے مسلمانوں کے اس دعوے کو مسترد کر دیا کہ عدت ختم ہونے کے بعد طلاق یافتہ بیوی کی سرپرستی کرنے کی اس کے شوہر کی کوئی ذمہ داری نہیں ہے۔ تب سے شاہ بانو کیس ہندوستان میں ایک ملک گیر سیاسی مسئلہ اور بڑے پیمانے پر زیر بحث تنازعہ بن گیا ہے۔ بی جے پی پہلی پارٹی تھی جس نے اقتدار میں منتخب ہونے پر UCC کا وعدہ کیا۔ یونیفارم سول کوڈ (UCC) ہندوستان کے لیے ایک مجوزہ مشترکہ قانون ہے جو شادی، طلاق، وراثت اور گود لینے جیسے معاملات میں تمام مذہبی برادریوں پر لاگو ہوتا ہے۔ 14 جون 2023 کو، ہندوستانی 22 ویں لاء کمیشن نے ہندوستانی آئین کے آرٹیکل 44 کے تحت UCC پر تجاویز طلب کی ہیں۔ بھارتیہ جنتا پارٹی (بی جے پی) کے لیے یہ 2016 سے پارلیمنٹ میں ایک ترجیحی ایجنڈا آئٹم رہا ہے۔
ان کے مطابق ہندوستان کے آئین کا آرٹیکل 44 ہندوستان کے پورے علاقے میں یکساں سول کوڈ کے نفاذ کی بات کرتا ہے۔ تاہم ہندوستان ایک متنوع ملک ہے جس میں 80% ہندو، 13.4% مسلمان، 2.3% عیسائی، 1.9% سکھ، 0.8% بدھ مت اور 0.4% جین ہیں۔ ہندوستانی آئین بھی مختلف مذاہب کی ثقافت میں فرق کو تسلیم کرتا ہے اور اس کا مقصد مذہب کے حق کے تحت ان کی حفاظت کرنا ہے۔ بی بی سی کے مطابق، اس یو سی سی قانون کا مطلب یہ ہوگا کہ تمام ذاتی مذہبی قوانین کو بالائے طاق رکھا جائے گا اور شادی، طلاق، وراثت وغیرہ کے شعبوں پر یکساں پرسنل لاء وضع کیا جائے گا۔ یکساں سول کوڈ بنیادی طور پر مذہب پر مبنی ذاتی قوانین کو تمام شہریوں کے لیے مشترکہ قوانین سے بدل دے گا، جو ممکنہ طور پر اقلیتوں کے حقوق اور ثقافتی تنوع کے خاتمے کا باعث بن سکتے ہیں۔ایسا لگتا ہے کہ بی جے پی کی طرف سے اقلیتی برادریوں کو نشانہ بنانے اور ان کے ہندوتوا ایجنڈے کو آگے بڑھانے کی ایک اور چال ہے۔ بی جے پی زور و شور سے یو سی سی کی وکالت کر رہی ہے۔ یہ وہی پارٹی ہے جو ایودھیا مندر کی تعمیر اور ہندوستانی آئین کے آرٹیکل 370 کو منسوخ کرنے کی کال کی بھی قیادت کرتی آئ ہے۔ یہ بی جے پی حکومت کے دور ہی کی بات ہے کہ: – امریکہ کی نسل کشی واچ نے ہندوستان کو مسلمانوں کی نسل کشی طرف مائل ملک قرار دیا ہے۔ عیسائیوں کے خلاف سالانہ 2000 سے زائد تشدد کے واقعات درج کیے جاتے ہیں۔
حال ہی میں منی پور میں نسلی تشدد کے واقعات میں 98 سے زائد افراد اپنی جانوں سے ہاتھ دھو بیٹھے اور 37,000 لوگ نقل مکانی کر چکے ہیں۔ سکھوں پر ریاستی ظلم و ستم نے آزاد خالصتان کے مطالبے کو جنم دیا ہے۔ نفرت انگیز جرائم بشمول دلتوں اور آدیواسیوں کے خلاف تشدد کا ارتکاب بھی کیا گیا۔ شیڈولڈ کاسٹ ذاتوں کے افراد کے خلاف 50,000 سے زیادہ مشتبہ جرائم اور آدیواسی لوگوں کے خلاف 9,000 سے زیادہ جرائم سالانہ رپورٹ ہوئے۔ بی جے پی کی زیرقیادت حکومت کے دور میں اقلیتی حقوق کی خلاف ورزیوں کا غیر معمولی ٹریک ریکارڈ اس حقیقت کی توثیق ہے کہ UCC کا استعمال اقلیتوں کے حقوق کی خلاف ورزی کرنے، ان کی شناخت کو مٹانے اور سماج پر ہندو غالب قوانین / طرز زندگی کو نافذ کرنے کے لیے کیا جائے گا۔ بی جے پی کے تفرقہ انگیز ارادے اور جس طرح سے انہیں انجام دیا گیا ہے اس نے بی جے پی کے یو سی سی کے مطالبے پر سوالیہ نشان ڈال دیا ہے۔ برابری اور یکسانیت کے بھیس میں بھارت کو “ہندوستان” بنانے کا بی جے پی کا بنیادی ارادہ UCC میں واضح طور پر دیکھا جا سکتا ہے کیونکہ یہ مسلمانوں اور دیگر اقلیتوں کے ذاتی معاملات میں اثر انداز ہوگا۔
اشوک کا مزید کہنا ہے کہ سابقہ یو پی اے حکومت میں ہندوستانی وزیر قانون ویرپا موئیلی نے کہا تھا کہ یو سی سی قابل عمل نہیں۔ “ہندوستان جیسے کثیر ثقافتی، کثیر نسلی اور کثیر جہتی ملک میں اسے نافذ کرنا ناممکن ہے”۔ عام طور پر ایک ملک کا آئین اقلیتوں کے حقوق کو اکثریت کے ہاتھوں پامال ہونے سے بچاتا ہے۔تاہم UCC اقلیتی برادریوں کے متنوع ثقافتی اور مذہبی طریقوں کو خاطر میں نہیں لاتا۔ ہندوستان میں سیاسی جماعتیں بھی یو سی سی کے نفاذ کے پیچھے بی جے پی کے مکروہ منصوبے سے واقف ہیں، عام آدمی پارٹی (اے اے پی)، ترنمول کانگریس (ممتا بنرجی) اور مذہبی سکھ جماعتیں یو سی سی کی مذہبی معاملات میں مداخلت کی مخالفت کرتی ہیں۔ مزید برآں، یکساں سول کوڈ (یو سی سی) کے نفاذ کی کئی گروپس بشمول ناگالینڈ بار ایسوسی ایشن اور مسلم کمیونٹی کی طرف سے بھی مخالفت کی جا رہی ہے۔ ناگالینڈ بار ایسوسی ایشن اور مسلم کمیونٹی نے خبردار کیا ہے کہ یو سی سی کے نفاذ سے سماجی انتشار پیدا ہو گا۔ یو سی سی کا نفاذ ایک سازش ہے جس کا مقصد اقلیتی برادریوں کے خیالات و عقائد کو پس پشت ڈالنا اور قوم کے تمام شہریوں پر ہندو غالب یو سی سی کو لازمی طور پر مسلط کرنا ہے۔
آل انڈیا مسلم پرسنل لا بورڈ نے بھی یو سی سی پر لاء کمیشن کے سوالنامے کا بائیکاٹ کرتے ہوئے کہا ہے کہ یہ آئین کی روح کے خلاف ہے، جو شہریوں کے اپنی ثقافت اور مذہب پر عمل کرنے کے حق کی حفاظت کرتا ہے۔ اقلیتوں کا کہنا ہے کہ مرکزی حکومت ’تین طلاق‘ کے معاملے پر عوامی ریفرنڈم نہیں کر سکتی، کیونکہ یہ مسلم پرسنل لاء کا حصہ ہے اور اس پر فیصلہ کرنے کی اجازت صرف مسلمانوں کو ہونی چاہیے۔ 21 ویں لاء کمیشن، جو کہ قانونی اصلاحات پر حکومت کے لیے ایک مشاورتی ادارہ ہے، نے بھی 2018 میں کہا کہ یہ ضابطہ نہ تو “ضروری ہے اور نہ ہی مطلوبہ”۔ درحقیقت، مودی ہندوستان کو تمام ڈومینز میں ہندو کنٹرولڈ ملک بنانے کے لیے اپنے ناروا اور فاشسٹ انداز میں ہندوستانی مسلمانوں پر ہندو پرسنل لاز کو مسلط کرنا چاہتے ہیں اور ساتھ ہی شادی، طلاق اور گود لینے وغیرہ جیسے بنیادی پرسنل لاز میں مداخلت کر کے ہندو پرسنل لاء کو مسلط کرنا چاہتے ہیں۔ وہ مساوات اور سیکولرائزیشن کے نام پر مذہبی اقلیتوں بالخصوص مسلمانوں کو کمزور کرنے کے لیے ہندو نظریات/عمل مسلط کرنے کے لیے تیار ہیں۔ بی جے پی کی یو سی سی کی چال بنیادی طور پر سیاسی فوائد اٹھانے اور آنے والے لوک سبھا انتخابات 2024 کے لئے اپنے ہندو ووٹ بینک کو مضبوط کرنے کے لیے ہے۔قارئین، ایک نام نہاد سیکولر ملک کا اصل چہرہ دنیا کے سامنے ہے۔ اقوام متحدہ، انسانی حقوق کے اداروں اور پوری دنیا کو بھارت پر دباؤ ڈالنا چاہیے کہ وہ اقلیتوں کے خلاف اس طرح کی امتیازی قانون سازی سے باز رہے۔
